Disfruta d’as suyas aguas bravas e turbulentas
Galligo ye uno d’os grans cursos fluvials d’a cuenca meya d’o riu Ebro, con 215 km de recorriu dica a suya desembocadura. O nombre d’este riu dimana d’o nombre en latín d’o suyo de prozedenzia, a Galia, o Gallicus, o Galligo e que da nombre a la Galliguera, zona sulcada por o suyo curso meyo.
O riu Galligo ye conoxiu internazionalmén por a practica d’o RAFTING en as suyas aguas bravas, en concreto os trampos que corresponden a la Plana de Uesca.
Os recorrius d’o riu Galligo se fan en os lugars de Murillo de Galligo e de Santolaria. O más abitual ye o recorriu entre a zentral de Carcavilla e Murillo. Cuenta con un fázil azeso. O suyo rapedo más conoxiu ye o “Paso d’as Olas”, e o primero que nos trobamos. Dimpués vendrán o “Envasador” como punto de mayor dificultat, o rapedo de “As Gradas”, o paso d’a “S” e “As ramas”, éste muito senzillo, e a “Presa rompida”. Contino s’arriba a la part más tranquila d’o riu.
O trampo entre Murillo e Santolaria ye muit apropiau pa fer con escolars e familias. O rapedo más animau se diz “A Lavadora”, con cuantas olas e escalerón final.
Pa practicar-lo no cal una preparazión física determinada, encara que sí ye menester contar con un guía en a embarcazión, asinas como o minimo equipamiento de vestius de neopreno e cascos, lo que fa que t’aconsellemos de contactar con profesionals d’as empresas de turismo activo.
