Rutas en coche
** Antimás d’as rutas abaxo desglosadas, consulta o nuestro nuevo folleto, novedat de febrero de 2018:
Enta o Reino d’os Mallos
Uesca-Boleya-Aniés e Virchen d’a Peña-Lobarre-castiello de Lobarre-Sasamarcuello-(Linars de Marcuello)-Ayerbe-Virchen de Casbas-(castiellos de Sanmitiel e Artasona)-Uesca.
Paisaches plenos de naturaleza, istoria e arte.
Tierras do o visitán podrá almirar as sierras de Lobarre e Caballera, os vutres sobrevolando as enfiestas formazions d’os Mallos de Riglos e as piedras d’a colechiata de Boleya, os castiellos de Lobarre e Sasamarcuello, u d’o palazio d’os Marqueses d’Ayerbe.
Por o plano d’a comarca
Uesca-armita d’as Dolors de Monflorite-Albero Alto, con ilesia, puzo e castiello de Corvinos-Novals- Pirazés-Sesa-Tramazet-Pertusa-Antillón, con murallas e puzo-Bespén-Blecua-Uesca.
Territorio d’o plano oszense conformau entre as tierras d’o Semontano e os Monegros.
Un mundo de planuras zerealistas do se combinan os carrascals con o mon baxo de tremonzillo, romeros e allacas. Romanos, musulmans e cristianos han deixau a suya impronta en exemplos fisicos –calzadas, puens, zequias, ilesias e armitas–, e inmaterials, espezialmén en l’ampla toponimia, encara ue vichén.
A Sotonera e os planos d’a Violada
Uesca-Montmesa-entibo d’A Sotonera-castiello de Tormos-Armita d’os Agudos-Alcalá de Gurrea-Gurrea de Galligo-Almudébar-Uesca.
O espazio sudueste d’a comarca aculle un territorio caracterizau por enormes planos zerealistas, prinzipalmén de secano e con bella pinzelada de regano. En ixe marco cheografico s’asientan cuantos umedals, como a istorica Laberca de Castilla u a más rezién construzión d’o entibo d’A Sotonera, que anegó o espazio de l’antiga Laberca d’Alboré. Umedals en que observar tot un mosaico d’espezies d’avifauna. A estas exzelenzias naturals se chuntan en este recorriu interesans exemplos monimentals, que fablan d’a dominazión islamica, de romanico, de gotico e de mudéchar, amás d’una arquitectura tradizional propia d’estos espazios semontanos.
