Ubicaus a o pedero d’as sierras prepirinencas, sobre zinglos rocosos u elevazions d’o terreno, s’alcuentran dos d’as fortalezas de mayor entidat d’Aragón: o castiello de Lobarre e o castiello-abadía de Montaragón, en Quizena. A suya estratechica situazión e a suya istoria nos tresladan dica o sieglo XI, cuan fuen fundaus por os reis aragoneses como abanza fren a la frontera musulmana e pa prener a ziudat de Uesca. A pesar d’as suyas diferens visizituz, os dos conservan tot lo entramau militar e relichioso –lienzos amurallaus, torretons, albarrana, torre de l’Omenache, rondas de vichilanzia, patios d’armas, ilesias–, e atras dependenzias –alchibes, magazens, cozinas, establos–, que permiten de comprender cómo yera a vida en un castiello medieval. Amás, Lobarre ostenta a particularidat d’estar o mayor complexo militar romanico d’Europa e, por ixo, d’o mundo, una construzión que ye estada, en más d’una ocasión, magnifico motivo documental e eszenario zinematografico: O reino d’os zielos (2005), d’o director Ridley Scott.

En os baixans d’a Sierra de Guara, a talaya de Santolaria, sobre o cañón d’o riu Guatizalema, feba de vichilanzia en tiempos d’a Reconquista.

En a Plana de Uesca puez, en bien pocos kilómetros, fer un viache por l’arte a traviés d’o tiempo. Os suyos exemplos d’arte romanico s’alcuentran entre as más bonicas e valiosas d’Aragón, como por exemplo a ilesia de Santiago d’Agüero, un monimental edifizio, inacabau, que guarda numbrosas sinyals de piquero e unas singulars esculturas en relieve: en a suya portalada destaca o capitel d’a danzarina, sinuosa e acrobatica, u a fantastica adorazión d’os Reis Magos d’Orién en o timpano. En as zercanías d’Ibieca se levanta l’armita de San Miguel de Fozes, construida entre o romanico e o gotico. En o interior s’ubican as tumbas d’a familia Fozes, os muros d’a cual son decoraus por pinturas goticas, una suzesión de imáchens e eszenas –tipo viñetas de cómic–, con figuras bien raixosas. Finalmén, en Uesca s’alcuentra o Zentro d’Arte e Naturaleza (CDAN)-Fundazión Beulas, un extraordinario museu d’arte contemporanio, espezializau en temas d’arte, paisache e naturaleza, que organiza abitualmén cursos, tallers didacticos e actividaz pa ninos.

Peñas, torrullons, mallos e atros perfils rocosos composan alguno d’os paisaches más emblematicos e fotografiaus d’a Plana de Uesca. As suyas formas escarposas e vigorosas son estadas esculpidas por una intensa erosión que cuesta treballo d’imachinar, e que responde a la diferén naturaleza e resistenzia d’as rocas que i trobamos. Ni os duros conglomeraus d’os mallos, ni as areniscas d’as serretas d’o sud d’a comarca han permanexiu a o marguin d’os conzietos de l’agua e o viento. No te pierdas una visita a os desafians e increíbles mallos de Riglos, referenzia mundial d’a escalada; u a o sucherén Salto de Roldán, con dos peñas que son a desinfome puerta d’entrada d’o ríu Flumen en a planura d’a Plana; u a la evocadera proa de 25 m d’altura que levanta a Peña d’o Medodía sobre a localidat de Pirazés. A tradizión tamién aporta a suya explicazión a las curiosas formas d’estas rocas. Ye o caso d’a bruxa filadera d’os mallos u d’a lechenda d’o caballero Roldán, que fuyó d’os musulmans grazias a o brinco d’o suyo caballo sobre as dos granizas peñas.

Os nuestros payes se dedicaban, mayoritariamén e d’estrela a estrela, a treballar en o campo. No existiba a mecanizazión. Tapoco no teneban luz u agua corrién en casa suya. Bel zentro d’interpretazión d’a Plana de Uesca posibilita azercar-se a ixa realidat e a os cambios suzedius en as zagueras decadas. A poca distanzia de Castilsabás, chunto a l’armita d’oViñero e rodiau d’oliveras, se levanta un conchunto etnografico de gran valor, un torno que amuestra a elaborazión tradizional de l’azeite. En Almudébar, villa con numbrosas bodegas excavadas en os zerros, o espazio “El Bodegón” profundiza en a elaborazión tradizional d’o vino. D’atra man, en Salillas existe una nevera u pozo de chelo, zarrau por cupula con espectaculars nervaduras, que nos fabla d’o magazenache de chelo u nieu pa a conservazión d’alimentos, o refresco de bebidas u l’uso terapeutico. Finalmén, a fuen d’os Moros ye un monimental pozo-fuen en Albero Alto, teste medieval d’a busca e condizionamiento d’o recurso más preziau: l’agua.