A unión de dos factors, como son o mosaico d’ambiens d’a Plana de Uesca que configura enormes posibilidaz de paisaches e abitats pa as aves por un costau, e l’abundanzia de zonas protechidas, como as ZEPAs (zonas d’espezial protezión pa as aves), seis en total, por atro, atorga a esta comarca un prestichio nazional e internazional en cuanto a turismo ornitolochico.
Dentro d’os barrancos calsinosos d’A Plana mora una d’as mayors conzentrazions de aves rupicolas de tota Europa, e dentro d’éstas, una nutrida presenzia d’aves rapazes, aves éstas carnivoras, reconoxibles por o suyo pico reganchau e as suyas garras fuertes e embanadas.
As más relevans son os vutres por o suyo numbro, e o cluxiuesos por estar una espezie en vías d’extinzión (amás, ye l’unico ave d’a planeta que s’alimenta de uesos) que aquí disfruta d’uno d’os pocos reductos europeus en que encara i permanex.
A sierra de Guara e o denominau Reino d’os Mallos han esdeveniu verdaders paradisos pa a observazión de rapazes rupicolas. Voletas, vutres, alicas, o zitau cluxiuesos u esparvero blanco.
Sobre os zielos d’os conglomeraus e barrancos que traviesan a comarca se pueden distinguir as caracteristicas siluetas de cada una d’estas grans rapazes, planiando con maestría a mercé d’as corriens d’aire.
En diferens puntos d’A Plana se son abilitaus espazios, tanto zarraus como a l’aire libre, que constituyen verdaders observatorios pa o disfrute e estudio d’estas aves. Puez alcontrar-los en as localidaz de Riglos e en Santa Zilia de Panzano.
Antiparte d’aves rapazes, as aves limicolas tienen o suyo abitat en os umedals d’o plano d’a Plana: os umedals d’a Laberca de Valdabra, la de Loreto e la de Cortés, en Chimillas, totas a escasos kilómetros a o sud de Uesca, e más que más o conchunto d’a Laberca d’Alboré e o entibo d’a Sotonera, estas zagueras cubillando amás una importán poblazión de grudas, en estar o descansadero más próximo a la cordillera pirinenca.
Folletos descargables:
Zonas de observación:
En Santa Zilia de Panzano existe un observatorio d’aves, chunto a o parque munizipal.
O Zentro d’interpretazión A Casa d’os Vutres, ubicau en o campanal d’a iglesia, posei distintas camaras de vidio que permiten de veyer os minchadors de vutres, cluxiuesos, voleta, alica e vutre.
En Santa Zilia de Panzano, instalau en l’antigo campanal d’a ilesia, este zentro e museu naturalista permite d’observar aves. Ye situau muit zerca d’o minchador de rapazes d’a zona.
Cuatre vitrinas-expositors dotadas de luz e son, una macropantalla de vidio pa veyer eszenas ineditas sobre a evoluzión d’os vutres en torno a o zercano fumaral de “A Pedriza”, ta o que acuden zientos de rapazes atraídas por o minchar que lis aporta o Fondo Amigos d’o Vutre, asinas como d’imáchens d’atras aves rapazes, proveniens d’atros Zentros d’interpretazión d’a mesma tematica conectaus en rete (La Falaise aux Vautours, en Franzia, e proximamén tamién Arcaz, en Riglos).
Alica crabitera
Vutre
Voleta
Cluxiuesos
