A Plana de Uesca contien a mayor part d’o Parque Natural d’a Sierra e os Cañons de Guara, e se i alcuentran os suyos más asombrosos contrastes, dende as maximas alturas d’o Tozal de Guara (2.077 metros) dica as grimas más profundas d’a sierra, como a Grallera Alta (cuasi 280 metros de profundidat), pasando por barrancos e gorgas tan famosas como o Barranco d’o Forniga o A Pillera, as Palomeras d’o Flumen u San Martín d’a Val d’Onsera e sin olbidar a belleza e prestanzia que arrodía os mallos de Ligüerri, en o entorno d’o entibo de Vadiello, u a o Salto de Roldán.
A espectacularidat d’o Parque de Guara reside en a orichinalidat d’os suyos paraches e en a inusitada belleza d’os suyos cañons, fozes, barrancos e gorgas. Actualmén ye a meta de muitos turistas de tota Europa, que atrayius por o suyo rico rete de cañons e barrancos naxiu de l’azión d’as aguas bravas d’os rius Flumen, Calcón, Forniga u Guatizalema, i plegan pa practicar o “barranquismo”, una actividat que naxió prezisamén en os espazios más profundos d’estas montañas e que, debidamén equipaus, permite a os suyos practicans recorrer estos paraches eslisando-se por rapedos u sumerchendo-se en as inundadas cuevas naturals. Tamién as parez de conglomerau que forman os mallos, tanto de Vadiello, como o Salto de Roldán, han esdeveniu referens nazionals entre os afizionaus a la escalada.
Sin duda, a mayor riqueza faunistica de Guara se falla en as suyas aves, espezialmén as rapazes, que fan niedo en as escarposas parez de roca que presienta o territorio. Este Parque ye uno d’os pocos reductos d’Europa an se puede veyer o cluxiuesos, rapaz en periglo d’extinzión. Acompañando a éste disfrutaremos d’a presenzia de voletas, alicas e una extensa colonia de vutres. Recuerda en a tuya visita que l’aria cuenta con distintas figuras de protezión que aduyan a la conservazión suya, como a declarazión de ZEPA (zona de espezial protezión pa as aves) u a propia de Parque Natural.
