Apuntes curiosos

En a Plana de Uesca existen seis tornos. Se localizan en os lugars d’Os Molinos de Sipán, Bespén, Boleya, Ayerbe e Almudévar. As prinzipals variedaz cautivadas son empeltre, verdeña e negral. No te pierdas a visita a o Molín d’o Viñero, en Castilsabás, un espazio expositivo etnografico que amuestra os prozesos d’este antigo ofizio.

Buens productos, buen servizio: algunos d’os restaurans aragoneses millor puntuaus en as guías gastronomicas d’o nuestro país s’alcuentran en esta comarca. Son Lillas Pastia, Las Torres, Tatau Bistro –en Uesca–, e La Venta del Sotón –en Esquedas–. A rezeta d’a gallina asada de Casbas fue ya replegada en o sieglo XV por Ruperto de Nola, guisandero d’o rei Fernando de Nápols.

A ziudat de Uesca s’ha asoziado, dende siempre, con una extraordinaria gastronomía. Ye un puesto en que ye prou con salir ta la carrera pa parar cuenta d’a amorisidat que se li tiene a esto de minchar e beber. E no se da cosa a formula que siga. Tanto a restaurazión de mesa e mantel, como la de barra funzionan en a capital.

Fa ya muito tiempo que l’alta restaurazión laurentina s’enchegó. Guisanders tan prestichiosos como Antonio Arazo, Carmelo Bosque, Sergio Azagra, Ana Acín, Darío Bueno e Rafael Abadía –u tan recordaus como Fernando Abadía– han feito e fan que a gastronomía d’elite tienga o suyo espazio en Uesca. De feito, fue a primer ziudat d’Aragón que rezibió as renombradas estrelas Michelín.

Antiparte, Uesca tien un comerzio alimentizio e gastronomico que inamora. Pastelerías que conservan un clasizismo renovau, botigas d’ultramarinos con años e años de solera, locals espezializaus en carnicos e en atros productos d’a zona, vinotecas e atros establimientos fan d’a capital un puesto en o que a crompa va dillá d’un simple furnimiento.